Kashmir Valley buainain ziaawm lam pan

Kashmir Valley-a buaina chhuak chuan ziaawm lam a pan a, mobile internet service pawh tihtawp lailawk a nih hnuin nimin aṭang khan pekchhuak leh a ni.

Handwara khuaa school naupang hmeichhe pakhat chu sipaiin mipat hmeichhiat lam hawiin mawi lo takin a khawih nia thu a than avangin mipui thinrim chuan sipai an bei a, sipaiten mipui hnawhkian tumin silaite an hmetpuak, buaina chhuak vanga thi mi panga an tling a ni. He thil thlen hnu hian khaw dangah pawh buaina hi punlunin, khaw eng emaw zatah curfew puan zui a ni.

Nimin khan hmeichhe naupang hian chief judicial magistrate (CJM) hnenah tu sipai mahin mawi lo taka an khawih loh thu a hrilh a, hemi hnu hian boruak pawh a dai ṭan niin an sawi. Hmeichhe naupang hian kar kalta Thawhlehni khan a school bang inthiar turin public toilet-ah a lut a, a chhuak lam chu tualchhung mi mipa pahnihin a bag pawhthlak sakin an au zui niin a sawi a, pakhat zawk chuan school uniform a ha tih a sawi bawk.

Chief of Army Staff, General Dalbir Singh chuan Pathianni khan Kashmir Valley boruak awmdan enfiah turin a kal. Udhampur-a Northern Command headquaters tlawhin, Northern Commander Lt Gen DS Hooda chuan venhimna an kalpui dan a lo hrilh. Sipai hotu hian Corps commander-te pawh a kawm nghal bawk a ni.

Kar kalta Inrinni khan Chief Minister Mehbooba Mufti-i pawhin Handwara hi a tlawh a, buaina chhuaka civil mite an thi chu ngaihthiam har tak a nih thu a sawi. CM chuan Defence Minister Manohar Parrikar pawh telephone-a biain, thil awmdan a hrilh thu leh, Army Coomander pawh a hmuh thu a sawi.