AAP hruaitute Jantar Mantar-ah chaw ngheiin an nuar

Enforcement Directorate (ED)-in Aam Admi Party (AAP) national convener leh Delhi chief minister, Arvind Kejriwal an man dodalna leh lungawi lohna lantir nan, nimin khan AAP hruaitute chu Delhi-a Jantar Mantar-ah chaw ngheiin an nuar.

Kejriwal man dodalna chaw ngheia nawrhnaah hian AAP hruaitu hlun tak tak, Ram Niwas Goel, Rakhi Bila, Atishi, Gopal Rai leh Imran Hussain te pawh an tel a, nimin chawhma dar 11 khan chaw nghei hi nei ṭanin, zan thleng a awh a ni. Nawrhna hmunah hian AAP Delhi unit convener, Gopal Rai chuan chaw ngheia Kejriwal man an dodalna lantirna chu mipui zawng zawngin zawm ve turin a sawm a, Delhi excise policy thubuai chu BJP-in remchanga hmangin AAP beih nana an hman mai a nih thu a sawi bawk. Kejriwal hi April 15 thleng hren a ni dawn.

Delhi-a Jantar Mantar bakah hian Punjab-ah pawh, Punjab chief minister, Bhagwant Mann leh AAP hruaitu dang eng emaw zatte chu Khatkar Kalan-a Shaheed Bhagat Singh nagar-ah pung khawmin, nilengin chaw ngheiin an nuar ve bawk a ni. India ram state dangah pawh Kejriwal man dodalna lantir nan hian chaw ngheia nuar an awm bawk a, ram danga India mi awmte pawhin, Boston-a Harvard square-ah te, Los Angeles-a Hollywood sign hmunah te, Washington DC-a India embassy kawtah te, NY Times Sqaure, Toronto, London leh Melbourne-ah te chaw ngheiin an pung khawm ve bawk a ni.