Jharkhand Singhbhum-ah kum tam tak hnua a vawi khat nan vote thlak dawn

Kumin Lok Sabha inthlan lo awm turah Jharkhand-a Singhbhum Lok Sabha seat hnuaia hmun tam takah chuan kum 10 chuang hnuah a vawi khat nan vote thlak a ni dawn. Heng hmunte hi Maoist helpawl inkulhna hmun a ni a, kumin Lok Sabha inthlanah hian vote thlak tura inbuatsaihna kalpui mek a ni.

Singhbhum seat hnuaia awm, Maoist thunun Saranda hi Asia rama ramngaw pik ber Sal forest-a awm a ni a, helai hmun fal leh khawpui hlat tak tak khuatea vote thlakna tur atan hian polling booth 118 siam a ni dawn a, vote thlak buaipuitu turte leh vote thlak nana hmanraw mamawh zawng zawngte chu helicopter hmanga thlak tur a ni. West Singhbhum district Election Officer, Kuldeep Chaudhary chuan,"Maoist helna avanga tuar nasa ber berte chu heng lai hmunah hian tam tak an awm a, vote nei zawng zawngin vote an thlak ngei theih nan hma kan la dawn a ni. Heng lai hmun ṭhenkhatah phei hi chuan kum 20 dawn hnua a vawi khat nana vote thlak turte an awm a ni," a ti.

Polling booth 118 an siamna tur hmun ṭhenkhat; Robokera, Binj, Thalkobad, Jaraikela, Roam, Rengrahatu, Hansabeda leh Chhotanagra-ahte hian vote thlak nana hmanraw mamawh helicopter-a thlak turin ruahmanna siam tawh a ni a, hmun dang ṭhenkhatah chuan vote thlak buaipui turte chuan km 4 chuang an kal a ngaihna tur hmunte a awm bawk a ni. Singhbhum-ah hian voter nuai 14 chuang an awm a, heng zinga nuai 7 chuang hi hmeichhia an ni. He constituency hi Scheduled Tribe tana reserved niin, BJP MP, Geeta Kora chu MP ni lai a ni bawk. Jharkhand-ah hian Lok Sabha inthlan hi thawh li; May 13, 20, 25 leh June 1 ahte neih tur a ni dawn a, Singhbhum-ah hian May 13-ah vote thlak a ni ang.