Sonam Wangchuk leh LAB-te'n ramri pana kawng zawh tum an ṭhulh

Climate activist Sonam Wangchuk leh Leh Apex Body (LAB) te chuan India leh China inrina ramri pana kawng zawh an tum thu an puan tawh chu nimin khan an ṭhulh leh zawk thu an puang.

LAB leh Wangchuk-a te hian nimin khan thuchhuah inṭawm siamin,"Tun hnaia thil awm dan thlirin, ram pum hian kan ramri dinhmun dik tak an hre tawh niin a lang a, hei vang hian LAB hruaitute chuan ramri pana kawng zawh tur (Pashmina March) hi ṭhulh rih mai ni se kan ti a ni. Chaw ngheia kan nawrhna erawh chhunzawm tur a la ni ang," tiin, kawng zawh tum an ṭhulh chhan hi Ladakh Lieutenant Governor-in an kawng zawh tur dang tura hma a lak vang niin an tarlang.

LAB hruaitute hian Pashmina March chu Changpa nomadic tribe-te'n China kutthlakna avanga an ram kilometre tam tak an hloh tarlan tumna a nih thu an sawi a, he an thil tum hi puitlin tawha an inhriat thu leh, Lieutenant Governor-in an kawng zawh dang tura ruahmanna siamin, Leh-ah CrPC section 144 a puan bakah, internet tihmuan leh Wangchuk-a thlawptute thlenga man an awm tak avangin, thil ṭha lo zawk a chhuah palh ven nan kawng zawh chu an ṭhulh thu an sawi a ni.

Sonam Wangchuak chuan kawng zawh ṭhulh chungchangah hian Lieutenant Governor rorelna chuan activist leh ṭhalai ṭhenkhat chu bond an sign loh chuan manah an vau thu sawi langin, section 144 hman chu a ṭul loh thu leh, boruak muanawm taka an nawrh thu sawiin, Ladakh-a Lt. governor rorelna chu a dem thu a sawi bawk.