Vawiinah West Bengal inthlan thawh ngana

West Bengal assembly inthlan thawh nga-na chu vawiin hian constituency 53 ah neih a ni dawn.

Inthlan thawh nga-na hi district pathum - south Kolkata, Hooghly leh South 24-Paragans ah neih a ni dawn, venhimna khauh taka kalpuiin Nilaini zan aṭang khan central force-te pawhin night patrol an nei tawh a ni.

Election Commission chuan inthlanna neihna tur bial chhunga police observer-te a dah belh bawk a, company 680 an duty dawn a ni. CrPC section 144 puan niin, hmun khatah mi panga aia tam awmkhawm khap a ni bawk.

Bial 53-a inthlanna neih turah hian candidate 349 awmin, vote nei mi vaibelchhe 1.2 an awm. Candidate zingah Chief Minister, Trinamool Congress hruaitu Mamata Banerjee pawh a tel a, Soth Kolkata-a Bhabanipur bialah dingin, Congress candidate union minister hlui Deepa Dasmusi leh BJP candidate, Subhas Chandra Bose-a tupa Chandra Kumar Bose-te nen an inkhing dawna ni. Candidate zingah minister ṭanglai eng emaw zat an awm bawk a, chungte chu Subrata Mukherjee (Panchayat), Partha Chatterjee (Education), Aroop Biswas (Housing and Youth Affairs), Manish Gupta (Power) leh Javed Ahmed Khan (Fire Service and Disaster Management).

BJP national president, Amit Shah chuan West Bengal-a rorellai, Trinamool Congress hneh tur chuan seat pakhat chauh, CM Banerjee-i dinna Bhabanipur biala chak a ngai a ni tiin, Subhash Chandra Bose pualin an party candidate chu vote ṭheuh turin mipuite a ngen.