US Congress Joint Session-ah PM-in thu sawi dawn

Prime Minister Narendra Modi chu June 8-ah US Cognress joint session-ah thu sawi tura sawm a nih thu US House of Representative Speaker, Paul Ryan chuan a sawi.

Washington-a press conference a neihah he thu hi sawichhuakin, Paul Ryan chuan India leh US inṭhianṭhatna chu khawvel huap pawha thil pawimawh tak a nih thu a sawi. Democracy ram lian pahnihten thawhdunna ṭha zawk an neih zel theihna turin, PM Modi-an joint session-a thu a sawi tur chu thil pawimawh tak a nih thu leh, he hun hi an nghahhlelh thu a sawi.

PM Modi hi US President Barack Obama'n zin turin a sawm a ni. India Priem Minister zingah Congress joint meeting hmaa thu sawi thei panga-na a ni ang. A hma hian Prime Minister hlui Manmohan Singh (July 19, 2005), Atal Bihari Vajpayee (September 14, 2000), PV Narasimha Rao (May 18, 1994) leh Rajiv Gandhi (July 13, 1985) -te chuan thu an lo sawi tawh a ni.

Hetihlai hian Delhi Chief Minister Arvind Kejriwal-a chuan Central Information Commission (CIC) hnenah Modi-a edu≠cational qualification chu mipuite hriata puangzar turin a phut. Information Commissioner M.Sridhar Acharyulu hnena lehkha a thawnah, Kejriwal-a chuan a chanchin sorkarin a record-te chu mipui hmuh theih tura puanzar chu
ṭha a tih thu sawiin, eng vangin ngen Commission chuan Modi-a educational degree chu a zep sak tih a zawt bawk. "Narendra Modi hian zirna lamah degree engmah a nei lo nia puhnate a awm a, ram mipuite hian thu dik tak an hre duh a ni" a ti.

March thla khan CIC hian Kejriwal hi MLA a nih avangin a chanchinte mipui hmuh theih tura puanzar a nih lohna tur chhan a lo zawt tawh a ni. Kejriwal chuan, "Ka chanchin leh record-te mipui hmuah puangzar vek turin min duh a, mahse Narendra Modi-a degree erawh in thup pui leh si" tiin a chhang let a ni.