Kanhaiya'n chaw ngheia nawrh huaihawt

Jawaharlal Nehru University (JNU) Students' Union leader, Kanhaiaya Kumar leh zirlai dang 19-te chuan university high-level committee-in an laka hremna a lekkawh danah lungawi lohna lantirin, tiam chin awm loin chaw an nghei.

Hetihlai hian Akhil Bhartiya Vidyarthi Parishad (ABVP) member-te chuan JNU administrative block hmaah tiam chin awm loin nawrh an huaihawt bawk.

Kanhaia Kumar, Umar Khalid leh zirlai 18-te chuan February 9 zana campus-a firifak, Afzal Guru-a puala inkhawm buatsaiha India ram dodalna thu sawia puh an nih chungchang, university high-level inquirty committee-in a chhui dan leh hremna pek an nih danah an lungawi lotih an sawi. JNU campus-a zirlaite hmaa thu a sawiah, Kumar chuan, "A tir aṭang khan inquiry committee hi kan ring zo lo tih kan sawi tawh a ni. An thil chhui dan hi a zahthlak a, hremna min pek pawh hi kan pawm dawn lo" a ti.

ABVP member-te hian JNUSU joint secretary leh an member, Saurabb Sharma chu campus chhunga traffic tibuaiah puh a nih avanga Rs 10,000 chawi tura committee-in a hrem chu an duh lohna an lantir ve bawk a ni.

Sharma chuan, "Ram dodal zawnga chete lo dan ka tum a, ram tana khua leh tui ṭha nih tumin ka bei zawk a ni. Hetichunga hremna min pe hi kan hrethiam lo a, sut leh ngei turin kan phut a ni" a ti.

February 11-a university in a din, member panga awmna inquiry committee hian Kumar hi Rs 10,000 chawi turin a ti a, hei bakah hian Kumar leh zirlai dang pahnih, Umar Khalid leh Anirban Bhattacharya-te chu semester khat ṭheuh hrem an ni bawk. Mujeeb Gatto chu semester hnih chhung hrem a ni a, Khalid chu Rs 20,000 chawi tur leh, May 13 hma ngeia pe turin an ti a ni.