Purunsen thawn chhuah man a tlawm; ram chhunga sumdawngte an mangang

Sorkar laipuiin ram pawna purunsen thawn chhuah khapna a pawhsei hnuah, khawvel puma purunsen man a sang chhoin, hetih lai hian United Arab Emirates (UAE)-a India-in purunsen a thawn man hniam lutuk avangin sumdawngte an mangang hle. Sumdawngte chuan India rama purunsen thartute'n purunsen an thawn chhuah aṭanga kg khat zela Rs. 12 - 15 vel chauh an hlawh laiin, chung purunsen vek chu UAE-a dawr neitute'n kg khata Rs. 120 chuang hlira an zawrh thu an sawi.

Sorkar laipui hian ram chhunga purunsen indaih lohna a thlen hlauhthawnna avangin nikum December khan tiam chin awm loin, ram pawna purunsen thawn chhuah theih zat a bituk a, ram dang sorkar aṭanga purunsen lei dilna an dawn dana a zira sorkar hriatpuinaa thawn chhuah a remti bawk. March 1 khan sorkar laipui hian UAE-ah purunsen metric ton (MT) 14,400 thawn a remti a, hei hi quarter tina MT 3,600 aia tam loa thawn tur a ni, hetih lai hian union commerce ministry chuan MT 10,000 chuang thawn belh tura remtihna a pe chhuak leh bawk.

Khawvel pum huapa purunsen thawn chhuahna man tlanglawn hi MT khatah Rs. vaibelchhe 300-400 a ni ṭhin a; India, Pakistan leh Egypt-in purunsen thawn chhuah khapna a siam hnuah, UAE-ah hian purunsen MT khat hi Rs. vaibelchhe 1,500 man hu a kai tawh a ni. Hetih lai hian purunsen thawn chhuah lama sumdawngte chuan sorkar laipuiin UAE hnenah hian purunsen MT khat hi Rs. vaibelchhe 500 aṭanga 550 inkar velin a pe niin an tarlang a, heta ṭang hian UAE-a purunsen la luttute chuan Rs. vaibelchhe 300 chuang an hlep a ni. Tuna an thawn chhuahna rate ang chuan, commerce ministry-in MT 10,000 thawn belh tura a ruahman aṭang pawhin Rs vaibelchhe 1,000 chuang an hlep belh leh dawn niin an sawi.

India ram aṭanga purunsen thawn chhuah hi National Cooperative Exports Limited (NCEL)-in an buaipui a, hei hi Ministry of Cooperation hnuaia awm a ni. Purunsen thawn chhuah kalpui dan hi ram pahnih sorkar indawrna aṭanga ruahmanna siam ṭhin a ni. India-in purunsen a thawn chhuahna man leh ram danga zawrh a nihna man inthlau lutuk avang hian Horticulture Produce Exporters’ Association te chuan NCEL hnenah hian lehkha an lo thawn tawh a, kar hmasa khan thuneitu sang lam biain, purunsen thawn chhuah aṭanga loneitute leh anmahni ngei pawhin an hlep chhe lutuk chu a thanat thlak an tih thu an sawi a ni.