Trinamool Congress hruaitute'n ECI an hmu

West Bengal-a Trinamool Congress (TMC) hruaitute chuan nimin khan sorkar laipui hnuaia thubuai chhui chian hna thawktu hrang hrangte hman sual an nih chungchangah Election Commission of India (ECI) an hmu.

TMC aiawha ECI hmu tura kalte hi Rajya Sabha-a TMC Member of Parliament, Derek O'Brien chuan a kaihruai a, an vaiin mi 10 an kal a ni. ECI hmu tura kal zinga mi, Dola Sen chuan,"BJP hian sorkar laipui hnuaia agency hrang hrangte hi an duh danin an hmang kual a, National Investigation Agency (NIA), Enforcement Directorate (ED) leh Central Bureau of Investigation (CBI) te hian TMC hruaitute um zuiin, min bei reng a ni. Hei vang hian Election Commission hian party zawng zawngte'n dinhmun inang tlanga inthlan kan hmachhawn theihna tur buatsaih se kan duh a ni," tiin, ECI hmu tura an chhuah hma hian a sawi a ni. Nimina ECI hmu tura TMC hruaitu 10 kalte hi ECI office kawtah ṭhuin an nuar chhunzawm a ni.

Inrinni khan kum 2022-a Bhupatinagar bomb puak chhuina kaihhnawiha West Bengal Purba Medinipur district-a rinhlelh man tura NIA mi leh sate kal lai chu mipui nen an intawng a, hei vang hian TMC chuan NIA leh BJP-te chu ruahmanna ṭha lo tak neia thawk dunah puhin, inthlan hnaih tawh avanga party dang beihna a nih thu an tarlang. Hetih lai hian NIA lam chuan ruahmanna ṭha lo neia kal an nih loh thu leh, mipuite chuan chhan awm miah loa an mi leh sate bei an nih thu an sawi ve thung a ni.

NIA-in TMC hruaitu pathum inlan turin an ko

Bhupatinagar bomb puak thubuaiah hian National Investigation Agency (NIA) hian nimin khan TMC hruaitu pathum chu thu zawh fiah tura an hmaa inlan turin an ko. NIA hian nimin khan thuchhuah siamin, TMC hruaitu pathum; Manab Kumar Karaya, Subir Maity leh Naba Kumar Ponda te chu Bhupatinagar bomb puak chhuina kal zel kaihhnawihah thu zawh fiah tura an koh thu hi tarlangin, kar hmasa khan heng mi pathumte hi NIA kohnaa an inlan tawh loh thu an tarlang bawk.