Khaw chin hrilh lawkna siamnaah India-in ram 5 a pui

Indian Meteorological Department (IMD) chief, Mrutyunjay Mohapatra chuan India-in khaw chin hrilh lawkna siam kawngah ram panga a puih mek thu sawiin, hei hian khaw awm dan chin hriat loh avanga nunna leh bungraw chân thleng palh theih lakah mipui tan hlawkna a thlen thu a sawi.

IMD hotu hian India chuan unau zinga a upa ber chan changin, Nepal, Maldives, Sri Lanka, Bangladesh leh Mauritius te chu khaw chin hrilh lawkna siam kawngah a puih thu a sawi a ni. India hian heng ram pangate hi United Nations-in 2022-a 'Early Warnings for All' hmalakna a tlangzarh kaltlangin, khaw chin hriat loh avanga chhiatna hrang hrang thleng thei pumpelh a nih theih nan a ti a ni.

Mohapatra hian khaw chin hrilh lawkna nei lo ram 30 hriat zinga panga hi India chuan a puih thu sawi langin,'Khawvel ram zahve vel hian khaw chin hrilh lawkna hi an nei lo. Ram tê leh rethei zawk tam tak hian hetiang an neih loh avang hian nunna hlu tak tak an chan phah fo a ni. Heng ramte hian a sum fai ang leh khawl bakah, thiamna thlengin ṭanpui an mamawh a, inremsiamna anga sum faia ṭanpuina bakah, India hian khawl thiamna leh mihring thiamna hmangin a ṭanpui a ni," a ti.