Arvind Kejriwal-a'n man a nih a khinna Delhi High Court-in a hnawl

Delhi excise policy thubuai avanga Enforcement Directorate (ED)-in an man, Arvind Kejriwal chuan Delhi High Court-ah man a nihna hi a khing let a, Kejriwal-a khinna hi Delhi high court-ah, Justice Swarana Kanta Sharma chuan nimin khan ngaihtuahin a hnawl.

Nimina thubuai ngaihtuahnaah hian high court chuan Kejriwal-a'n man a nih a khinna hi bail pekna tur ni loin man a nih chu dan kalh a nih leh nih loh fiahna tur a ni a, he thubuai chinfel dana zir hian court hian chhuah a nih tur leh tur loh hi a rel leh chauh tur a ni, tiin a tarlang. High court hian Kejriwal chu pawisa chheprelh chungchangah man a nih thu te, inthlan hma khera man a nih chungchang a khinna te chu a ngaihtuah a, ED-in Kejriwal an manna hi a dik a, eng dan mah bawhchhiat a awm lo tih hi court thutlukna a ni tiin a puang. Court chuan Kejriwal hi April 15 thleng judicial custody-a hren tura thuthlukna siam tawh pawh a ngai ang vek a la nih tur thu sawiin, Kejriwal-a'n ED-in an man a khinna hi a hnawl a ni.

Kejriwal hian Delhi High Court-ah hian ED-in an man dan chu a dik loh thu leh dan kalh a nih thu a sawi a, hei vang hian man a nihna hi sut a, chhuah a nih theih nan court-ah hian a thlen a ni. Kejriwal-a aiawha ding, Abhishek Manu Singhvi pawhin Kejriwal man a nih chhan chu Lok Sabha inthlana a tel theih loh nana ruahmanna a nih thu leh, ED pawhin an puhna anga a tihsual fiahna tur engmah an hmuh loh thu a sawi ve bawk. ED erawh chuan Kejriwal-a'n man a nih a khin letna hi an dodal ve thung a, inthlan lo awm tur avang ringawta man a nih theih lohna tur a awm loh thu an sawi ve thung. Kejriwal hi Tihar jail-ah dah mek a ni a, hetah hian April 15 thleng dah turin Delhi Rouse avenue court chuan thupek a chhuah tawh a ni.