Sorkar laipuiin protected monuments zinga 18 a paih dawn

Sorkar laipui hnuaia Ministry of Culture chuan ram tana hmun pawimawh an nihna a awm tawh lo nia hriat avangin protected monuments zinga 18 chu paih a tum thu thuchhuah siamin a tarlang.

Sorkar laipui hian Ancient Monuments and Archaeological Sites and Remains Act, 1958 (AMASR Act) section 35 hmangin, ram tana pawimawh leh hlu nia hriat, hmanlai thil hlui leh hmun hlui, sorkarin a venhim bikte dinhmun aṭanga paih theihna a nei a, hemi hmang hian heng hmun hlui, humhalh leh venhim bik hnuaia awm 18-te paih hi a tum a ni. Sorkar laipuiin heng hmun 18, protected monuments aṭanga paih a tumte hi mipui lam aṭanga dodalna leh duh lohna awmte thlenna hun atan thla hnih hun a hawng bawk.

Hmanlai hmun hlui leh thil reng reng, ram tana hlutna leh pawimawhna nei nia hriatte chu AMASR Act hnuaiah hian protected monument anga dahin, humhalh leh venhim bik a ni ṭhin a, hei hi ministry of culture-in Archaeological Survey of India (ASI) kaltlangin a thawk a ni. Hetih lai hian AMASR Act section 35 hmanga sorkar laipuiin protected monuments an nihna aṭanga a paih chuan ASI emaw, ministry of culture hian heng hmun venhim leh humhalh bakah enkawl hna hi an thawk chhunzawm tawh dawn lo a ni.

Sorkar laipuiin monuments aṭanga paih a tumte hi, Arunachal Pradesh-a Copper temple te, Haryana-ah Kos minar, Madhya Pradesh-ah inscription in the fort of Bachhaun, Delhi-a Bara Khamba cemetery leh Inchla Wali Gumti, Rajasthan-a inscription in fort leh 12th century temple, Uttar Pradesh aṭangin; Kos minar 13, Cemetery in Gaughat, Cemetery in Jahraila road, Tombs in Lucknow-Fyziabad road, Gunner Burkills tomb, closed cemetery, small linga temple circa 1000 AD, Telia Nala Buddhist ruins, Tablet on treasury building, banyan grove, leh Uttarakhand-a Kutumbari area-te an ni.

Tun dinhmunah ASI hian ram chhung hmun hrang hrangah monuments 3,693 a enkawl mek. Kum 2023-a Parliamentary Standing Committee on Transport, Tourism and Culture-in ‘Functioning of the Archaeological Survey of India’ report a pekah, ASI enkawl mek hmun ṭhenkhat hi ram tana hlutna em em nei tawh lo leh tenau, a enkawlna kawnga harsatna awm bawk si niin a tarlang.