J&K leh Ladakh-ah Congress leh NC thawk dun dawn

Lok Sabha inthlan lo awm tur atan Jammu and Kashmir leh Ladakh union territory-ah Congress leh National Conference (NC) party-te chuan seat chuh tur insemin, thawh dunna tur an tifel.

Congress leh NC-te hian New Delhi-ah thuchhuah inṭawm siamin, kum 2024 Lok Sabha inthlan lo awm tur atana thawh dun an tum thu hi an puang a, inremna an siamah hian Jammu province-a seat pahnih, Udhampur leh Jammu te chu Congress hian an chuh dawn a, Ladakh UT-ah seat pakhat an chuh bawk ang. NC hian Kashmir Valley-a Lok Sabha seat pathum, Anantnag-Rajouri, Srinagar le Baramulla te an chuh ve thung dawn a ni.

National Conference vice president, Omar Abdullah chuan,"Vawiin hian Congress leh NC-in Jammu and Kashmir leh Ladakh UT-ah te Lok Sabha inthlan lo awm tura thawhhona thuthlung kan ziah fel thu hi ka puang a ni. NC hian Congress candidate-te hi a thlawp dawn a, INDIA hian J&K leh Ladakh mipuite tan hna thawkin, rorelna inah an ai a awh dawn a ni," a ti.

Congress leh National Conference party-te hi INDIA-a thawkho an ni a, anni pahnih bakah hian regional party tho, Peoples Democratic Party (PDP) pawh INDIA-ah hian an tel a ni. Hetih lai hian J&K leh Ladakh-a Lok Sabha seat chuh tur insemnaah hian PDP hi an tel lo thung a, hemi chungchangah hian Congress hruaitu, Salman Khurshid chuan,"Seat insem chu thawhhona kawng khat a ni a, PDP hi INDIA-a tel ni mah se, INDIA-a thawhhona hi kawng dang a ni leh a ni. Kan theihtawp chhuah mah ila J&K hi kan zavai atan chuan a tê deuh a ni," tiin a sawi. Kar hmasa khan PDP president, Mehbooba Mufti chuan J&K-ah Congress a thlawp tur thu leh, PDP chu Jammu province-ah an din loh tur thu a lo sawi tawh a ni.