Supreme Court-ah Kejriwal-a'n man a nih a khing leh

Delhi chief minister, Arvind Kejriwal chuan Enforcement Directorate (ED)-in an man a khinna Delhi High Court-in a hnawlsak hnuah, nimin khan man a nih chungchang hi Supreme Court-a ngaihtuah turin a thlen leh.

Aam Admi Party (AAP) hruaitute chuan Supreme Court-ah hian Chief Justice of India, DY Chandrachud hnenah Arvind Kejriwal man a nih dan chungchang hi an thlen a, Supreme Court hian a rang lamin ngaihtuah se an duh thu an sawi bawk. Arvind Kejriwal hian March 21-a ED-in an man tukah Supreme Court-ah hian petition a theh lut nghal a, mahse, a hnuah a hnukdawk leh a ni.

Delhi High Court-in Kejriwal-a'n man a nih a khinna chungchang a ngaihtuahnaah hian thubuai ngaihtuahtu, Justice Swarana Kanta Sharma chuan, Kejriwal chu ED kohna anga a inlan loh avangin ED-in man mai loh chu duhthlan tur an neih loh thu sawiin, ED-in an puh chu thil dik lo tihna kawnga inhnamhnawihna neih a nih thu te, ED hian chief minister an ni emaw ni lo emaw, man theih dan thu-ah inkaihhruaina hran an nei loh thu leh court-in chutiang dan siam a tum loh thu a sawi bawk.

Hetih lai hian AAP hruaitu leh Delhi minister, Saurabh Bharadwaj chuan ED emaw CBI emaw pawhin Kejriwal an puhna chungchangah hian cheng khat pawh a kuta aṭanga man tur an neih loh thu sawiin, Delhi excise policy thubuai veka man, Sanjay Singh pawh High Court-in bail a dilna a hnawl hnuah Supreme Court-in a phalsak leh a, Kejriwal-a chungthu pawh Supreme Court chuan dik taka a rel a beisei thu a sawi a ni.