Khaw lum avanga harsatna thleng chhinchhiaha hriattir turin state leh UT-te ngen an ni

Sorkar laipui hnuaia National Centre for Disease Control (NCDC) for State Health Department on Heat Wave Season 2024 chuan thuchhuah siamin, khaw lum avanga damlohna leh thihna bakah, harsatna hrang hrang thlengte an chhui mek karah, India rama state leh UT zawng zawngte chu an thuneihna huam chhunga hetiang thil thleng chhinchhiah a, hriattir turin an ngen.

NCDC thuchhuahah hian state leh UT-te chu an huam chhunga khaw lum avanga thihna leh harsatna thleng hrang hrang an chhinchhiahte Integrated Health Information Portal (IHIP)-ah theh lut turin an hriattir a, inthlan a hnaih tawh avangin mipui pun khawm dan tur chungchanga inkaihhruaina te, khaw chin hrilh lawk, chhun dar 12 leh dar 3 inkar pun khawm loh te, medical camp neihna tur uluk zawka thlan chungchang te an tarlang bawk a ni.

NCDC-te'n thuchhuah an siam bakah hian doctor-te chuan khaw lum lo thleng turah hian mipuite chu an taksa dinhmun vil uluk turin an ngen a, taksa mamawh khawp tui in tur te, lu hai, lu na, tui hal huam huam, ka chhung ro, zun tlem, leh ni aṭanga allergy an neih theih te inchik reng turin an ngen a ni. "Khaw lum zual zel tur thlir lawkin, thihna leh harsatna tam tak pumpelh a nih theih nan pawn lama kan awm hun chhung leh awm hun mumal zawka siam a, ni sat loh deuh lai kan thlan te pawh a ṭul dawn a ni. Sunscreen hman a ṭha a, kawng a chin chung lam hi ni saah minute 15 aia rei awm loh hram a ṭha bawk. Khaw lum avanga taksa harsatna hrang hrang bakah ni zung avanga vun lam harsatna te pawh thleng thei a ni a, pumpelh tura kan theih ang anga inven a ngai a ni," tiin Ujala Cygnus Group of Hospital doctor chuan a sawi bawk.