TMC hruaitute Delhi-ah an nuar chhunzawm

Trinamool Congress (TMC) hruaitu, Thawhṭannnia Election Commission of India (ECI) hmua an thil phutte nawr avanga police-in an lo man tawhte chu Delhi-a Mandir Marg police station-ah an nuar chhunzawm zel.

TMC hruaitute hian ECI hnenah Enforcement Directorate (ED), Central Bureau of Investigation (CBI), National Investigation Agency (NIA) leh Income Tax (IT) department-te chu central-a sorkar lai, BJP nen thawk dun leh, BJP-in an duh tihpuitlin nana hmanruaa an hman thu thlenin, heng department-a hotute hi bang tura an duh thu an sawi a ni. Hemi hnu hian EC office kawtah hian darkar 24 nawrh tumin an pung khawm a, Thawhṭanni tlai vek khan police-te'n manin zan lamah chhuah ni mah se, TMC hruaitute hian an thil phut nawr nan hian police station kawtah hian an nuar chhunzawm a ni. TMC hruaitute hian nimin khan an nawrh hi an titawp a, nuar zingah hian Derek O,Brien, Saket Gokhale, Sagarika Ghose, Dola Sen leh Nadimul Haque te pawh an tel a ni.

Election Commission hnena ED, CBI, NIA leh IT department hotute ban phuta an nawrh chungchangah hian Saket Gokhale chuan,"Keini, TMC MP 10 leh MP hluite hian EC office kawtah ralmuang takin kan nuar a, man kan nih hnuah police station-ah hian dah kan ni leh a ni. Darkar 24 nawrh tum kan nih angin kan nuar chhunzawm a, Modi-a, Amit Shah leh BJP-in sorkar laipui hnuaia agency-te dik lo taka an manna hi kan dodal zel dawn a ni," a ti. TMC hruaitu nuarte hi Delhi-a AAP hruaitu, Saurabh Bharadwaj leh Dilip Pandey te chuan an nawrhna hmunah tlawhin, AAP chuan an thlawp thu an sawi ve bawk.