India-in Israel-ah hnathawktu 6,000 a tir dawn

Israel leh Hamas indona avanga thawktu indaih lohna phuhruk nan, India chuan Israel-a hnathawk tur mi 6,000 a tir dawn niin Israel sorkar thuchhuah chuan a tarlang. Heng hnathawk turte hian April leh May thla chhungin Israel an pan dawn a ni.

Israel hian indona an hmachhawn avangin construction sector-ah Israel mi hnathawk tur an indaih loh nasat thu an sawi a, India aṭanga hnathawk tura kal turte hi Israel Prime Minister Office, Finance Ministry leh Construction and Housing Ministry te'n inbiakna nei a, thlawhtheihna an tihfel theih hunah Israel an pan theih tur thu an tarlang a ni. Israel chuan hun rei lote chhunga ram dang mi, Israel-a hnathawk tura an luh tam ber ṭum a nih tur thu sawiin, prime minister Benjamin Netanyahu chuan thawktu indaih lohna avanga hmasawnna hna thawh hrang hrang a chawlh thu te, chu chuan khawsak a tihhautak belh thu leh, sumdawnna ṭhenkhat pawhin a tawrh thute a sawi.

India-in Israel-a hnathawktu a tirh tur hi ram pahnihte sorkar (Government-to-Government) inremna kaltlanga neih a ni a, kar hmasa khan mi 64-in Israel hi thleng tawhin, April thla laihawlah mi 850 tirh belh leh tum a ni. Israel-ah hian construction sector-a hnathawktu tam ber hi Palestinian authority-te thunun, West Bank aṭangin mi 80,000 vel an awm a, Gaza Strip aṭangin mi 17,000 vel an awm bawk. Heng zinga a tam zawk hnathawh phalna hi nikum October thlaa indona chhuah hnuah tihtawp a ni.