UP sorkarin Class 1-a admit theih chin naupang kum bithliah

Uttar Pradesh sorkar chuan sorkar sikul zawng zawngte tan hriattirna tichhuakin, sorkar laipui rawtna anga, naupang kum 6 tling chin chauh pawl 1 zir tura admit theih an nih thu a tarlang.

Thuchhuah an siamah hian UP sorkar hian April 1, 2024-a kum 6 tling chinte chauh pawl 1 zir tur hian admit theih an ni dawn a, kum 6 la tling lote chu kindergarten-ah admit tur an nih thu leh, hei hi sorkar laipuiin New Education Policy (NEP), 2020 a tlangzarh taka zirna in hrang hrangte zawm tura a ruahman a nih thu an tarlang tel bawk.

Basic education director, PS. Baghel chuan district education officer zawng zawngte chu April thla chhunga sikul bang tawh naupangte zawng chhuak tur leh, sikul kaltir tura ruahmanna siam turin a hriattir bawk. Right of Children to Free and Compulsory Education Act 2009-in a kawhhmuh anga naupang zawng zawngin an chanvo, sikul aṭanga zirtirna dawn chu tihhlawhtlin an tum thu a sawi a ni.

Sikula kal tur naupang zawng zawngte sikula an hming an ziah luh laiin an aadhar number lak tur a ni dawn a, naupangin aadhar a nei lo a nih chuan an nu leh pate aadhar lak tur a ni dawn a ni. Zirna in kalphung thlak leh hetianga hmalak hi NEP 2020-in India ram puma zirna in zawng zawngin inang tlang leh hmasawn zawka inkaihhruaina an neihna atana ruahman a ni.