CAA, NRC leh UCC an pawm loh tur thu Mamata-i'n sawi

West Bengal chief minister Mamata Banerjee chuan an state-a Citizenship Amendment Act (CAA), National Register of Citizens (NRC) leh Uniform Civil Code (UCC) hman a nih ve loh tur thu a sawi.

Mamata hian Muslim-te'n an chaw nghei (Ramadan) tawp ni atana an hman ṭhin, Eid-Ul-Fitr lawmna Kolkata-ah a hmanpui a, he hunah hian thu sawiin,"Inthlan laiin mi ṭhenkhatin tharum thawh zawnga che turin hma an lo la leh anga, mi thangkama awk a, mi ruahmanna suala tlu lo turin ka chah duh che u a ni. CAA hi kan pawm ngai dawn lo a, chutiang chiah chuan NRC leh UCC pawh hi West Bengal-ah hman a ni lo ang. Kan ṭanho tlat chuan tu mahin min tibuai thei lo ang," tiin, TMC chu BJP nen an inbuan mek niin a sawi.

"INDIA-a party dangte nen kan thawhhona chungchangah chuan nakinah thutlukna kan la siam ang a, Bengal-ah erawh hi chuan TMC tih loh, party dang reng rengin vote an hmuh loh nan ka sawm duh che u a ni" tiin, Mamata hian sorkar laipui hnuaia agency hrang hrang BJP-in dik lo taka an duh dana an hmang ṭhin chu ṭha lo a tih thu a sawi bawk.