QS world university ranking-ah India rama university 69 an lang

QS world university ranking 2024 chu tihchhuah niin, khawvel university hrang hrang ṭha zual 500 thlan chhuahah India ram aṭangin university 69 an lang. QS world university ranking-a India ram university tel zat hi 424 an ni a, hei hi nikuma univeristy tel, 355 aiin 19.4 percent-in a tam a ni.

Ranking hi subject hrang hranga ṭhen a ni a, Jawaharlal Nehru University (JNU) chu development study course-ah 20-na niin, India ram university zinga che ṭha ber a ni. Indian Institute of Management, Ahmedabad (IIM Ahmedabad) chu business and management studies-ah 22-na niin, IIM Bangalore leh IIM Calcutta-te chu 32-na leh 50-na an ni ve bawk. IIT Delhi chu global institution top 50 thlan zingah langin, 45-na a ni. Engineering and Technology-ah IIT Bombay chu 45-na a ni a, IIT Bombay vek hi engineering minerals and mines subject-ah 25-na ni bawkin, IIT Madras chu petroleum engineering-ah 29-na a ni. Heng bakah hian Chennai-a Saveetha Institute of Medical and Technical Sciences chu dentistry study-ah 24-na a ni a, QS tehfung pakhat, H an tihah, India ram university world ranking-a tel zinga full mark (mark 100) hmu tling awm chhun a ni bawk.

QS-in an tarlan danin India ram chu khawvel huapa research tihna hmunpui a ni chho mek a, kum 2017 leh 2022 inkarah khan India rama research bei hi 54%-ah pungin, hei hi khawvel puma research ti zawng zawng zat lak rual aia sang a ni.