Kum 2024-2025 chhunga India GDP ṭhanna tur 7%

Asian Development Bank (ADB) chuan kum 2024 - 2025 chhunga India Gross Domestic Product (GDP) ṭhanna tur chu 7% a nih thu a sawi.

Kum 2023-2024 chhunga India GDP ṭhanna hi 7.6% ni mah se, ADB hian 2024-2025-ah chuan 7% a ni dawn niin a sawi a, hei hi 2025-2026-ah chuan 7.2%-ah a chho leh dawn niin an sawi bawk.

ADB hian India GDP ṭhanna chu nghet tawk tak ni chho tura an ngaih thu an sawi a, Asia Development Outlook an tihchhuahah thil man sanna pawh kumin chhung chuan 4.6%-ah tlahniam tura an ngaih thu te, kuminah chuan mumal zawka thlai thar theih tawh turah ngaiin, ei tur lam chi man sanna pawh 5.7%-ah a tlahniam dawn niin an tarlang bawk a ni.

Kuminah hian ruah tui tla hi nikum aia mumal zawk tura ngaih a ni a, nikuma ruah sur mumal loh avanga thlai thar chhuah tlemin mi tam tak eizawnna a nghawng pawh ziaawmin, hei hian thingtlang lama thil lei pawh titam a, Mahatma Gandhi National Rural Employment Guarantee Act hnuaia hnathawh pawh pung tura ngaih a ni bawk. ADB director of macroeconomics, Abdul Abiad chuan India chu South Asia ram zawng zawng GDP aṭanga 80% changtu a nih thu sawiin,"India-ah hian GDP ṭhanna hi ṭha chho zel tura ngaih a ni. Hei hi a chhan chu investment lama an ṭhanna avanga thil lei pung chho zelin a thlen a ni," a ti.