PM Modi-a'n J&K state-a hlankai leh a tiam

Prime minister Narendra Modi chuan nimin khan Jammu and Kashmir-ah assembly inthlan neih a nih thuai tur thu sawiin, state puitlingah hlankai leh a tiam bawk.

J&K-a Udhampur-a Lok Sabha inthlanpui neih tur puala election rally a neihnaah Prime Minister chuan he thu hi a sawi a, Jammu and Kashmir thar, mawi tak chu a mitthlain a hmu lawk tih a sawi. 'Modi chuan thil tam tak a ngaihtuah lawk a ni. Thil lo thleng tawhte chu a chhinna mai chauh a ni. Jammu and Kashmir thar leh ropui tak siam turin ka buai hle. Assembly inthlan neih pawh a hla tawh dawn lo, Jammu and Kashmir chuan statehood status a nei leh dawn. In duhthusam chu in MLA leh minister-te nen in sawiho thei tawh ang," a ti.

Prime Minister chuan Lok Sabha inthlan lo awm tur pawh J&K-ah chuan firfiak, inbeihna, lunga intawng leh ramri-a inkahna thleng awm ṭhinte hlauhthawnna tel miah lohin neih a ni dawn tih a sawi. "Kum tak tam hnuah, hlauhthawnna awm loin tun ṭum inthlan hi kan nei thei dawn a ni. J&K chuan hmasawnna a takin a hmu a, mipuite'n sorkar an rinna pawh a nghet tial tial a ni," tiin a sawi. Hemi rual hian Congress leh INDIA chu bei tel nghalin, ram mipui tam zawk duh dan an ngai pawimawh lo a, mipuite infiamna atan an hmang niin a puh. J&K-ah hian Lok Sabha inthlan hi thawh ngaa nei a ni ang.