BJP-in Delhi-ah President's rule puan an tum niin AAP-in sawi

Delhi-a rorel lai, Aam Admi Party (AAP) hruaitu, Atishi chuan central-a sorkar lai, BJP chuan Delhi-a AAP sorkar chu paihthlak a, president's rule puan an tum niin a sawi.

Atishi hian thu rintlak tak an hriat aṭanga Arvind Kejriwal-a sorkar BJP-in paihthlak an tum tih an hriat thu hi a sawi a, department hrang hrangah hmun ruak a awm reng chungin Delhi-a IAS posting pawh hun rei tak khawih a nih loh thu a tarlang bawk a ni.

"Arvind Kejriwal hi thubuai dik loah man a ni a, fiahna awm miah loa man a ni hi Delhi sorkar paihthlak tumna a ni. Thil thlen tawh dan enin inphiarrukna a awm ngei tih hi a lang a ni," tiin Atishi chuan press mite hmaah a sawi. "Delhi-ah hian officer dah an ni lo a, transfer pawh an awm hek lo, inthlan puan a nih hnuah officer tu mah meeting-ah an la tel lo bawk. An thil tum puitlin nan hian Kejriwal-a secretary thlengin an man tawh a ni," a ti.

Hetih lai hian BJP erawh chuan AAP puhna hi an pha thung a,"AAP hian thawnthu phuah chawpin thu an vawrh darh mai mai a ni. Officer dah an nih loh chungchangah hi chuan Delhi chief minister hian nikum September thla aṭang khan Delhi lieutenant general a la hmuh loh vang a ni," tiin BJP thupuangtu, Harish Khurana chuan a sawi ve thung.