PM Modi-a'n khaw lum lo thleng tur atana India inbuatsaihnate thlirhona a neihpui

Prime minister Narendra Modi chuan Ningani khan official ṭhenkhat nen khaw lum lo thleng tur atana India inbuatsaihnate thlirhona an nei a, meeting hi PM Modi chuan a kaihruai a ni.

India Meteorological Department (IMD) chuan tun thla tir lama kumina India rama khaw lum dan tur thlir lawkna an tihchhuahah, central India leh western peninsular India te chu khaw lum tuar nasa zual turah a dah a, India ram hmun tam zawk chu kum dang aiin a lum dawn bawk niin an tarlang. IMD-in an tarlan danin khaw lum zual hun hi April aṭanga June thla chhung a ni dawn a ni.

Meeting-ah hian kawng hrang hranga khaw lum lo thleng tura inbuatsaihna; inenkawlna lam (health sector)-a damdawi mamawh tur awm dan te, taksain tuiril tlakchhamna a chhawktu intrevenous fluids an tih te, vur dah khal, ORS leh tui thianghlim in tur awm dan te sawiho a ni. Mipuite hriat tur thu pawimawh inchahna Information, Education and Communication (IEC) bakah, TV, radio leh social media kaltlanga ṭawng hrang hranga awareness inpekna hmanrua te sawi ho a ni bawk. Health ministry thuchhuah, kum 2024-ah kum dang aiin nipui khua lum zawk tura ngaih a nih thu leh, invenna leh inenkawlna hrang hrang tarlante chu a zau thei an bera theh darh a, mi zawng zawng hriatthiam theih tura lehlin ṭha an tih thu meeting-ah hian an sawi bawk.