India mission-in Israel buaina chungchangah hriattirna tichhuak

Israel leh Iran buaina avanga Iran-in Israel a kah avangin mi tam tak ralkhelin an awm a, hei vang hian Israel-a India mission chuan India mite tan hriattirna a tichhuak.

Iran hian Syria, Damascus-a an consulate beih a nih chungchangah Israel chu mawhphurtua puhin, Inrinni khan missile leh drone 300 chuangin Israel hi a kap a, hei vang hian India chuan Israel-a a mi leh sate tan venhimna chungchangah inkaihhruaina a tichhuak a ni. India-in hriattirna a tihchhuahah hian mipuite chu chiai lo tur leh, sorkarin mipui himna tura ruahmanna a siamte zawm turin a chah a ni.

"Tun hnaia buaina chhuak avangin, Israel-a India mi awmte chiai lo turin kan inngen a, ṭul loah chuan zin lo tur leh thuneitute ruahmanna siam zawm turin kan inngen bawk a ni. Israel-a India embassy pawhin thil awm dan a thlithlai reng a, Israel sorkar thuneitute nen inbiain, India mite himna tur a ngaihtuah a ni," tiin thuchhuahah hian an tarlang. India mission thuchhuahah hian India khua leh tui, Israel-a awmte chu embassy-a an hming ziak lut turin a hriattir a, inziah luhna tur link a dah tel bawk a ni.

Iran-in Israel a beih avang hian khawi ram mahin Israel aṭanga an mi leh sate la chhuak turin ruahmanna an la siam lo a, hetih lai hian Israel-ah erawh zirna in zawng zawng khar niin, sorkar leh private office-te erawh dan pangngaiin an kal thung a ni. Israel Defence Force (IDF) thupuangtu chuan, Iran-in Israel beih nana missile leh drone a kah 300 chuang zinga 99% chu kah thlak an nih thu sawiin, Iran hian an bei leh lo ang tih a sawi theih loh thu a tarlang.