'Health Drink' category aṭanga Bournvita paih turin hriattir

Ministry of Commerce and Industry chuan e-commerce company zawng zawng hnenah, an website leh platform-a 'health drink' caterogy-a thil in chi lam an dah zawng zawng chu paih vek turin a hriattir a, heng zingah hian Bournvita pawh a tel.

Hriattira a tihchhuahah, Ministry chuan Protection of Child Rights (CPCR) Act, 2005 hnuaia National Commission for Protection of Child Rights-in a chhui chian hnuah, FSS Act 2006 rules and regulation-ah 'health drink' tih hi a awm lo tih a sawi.

FSSAI chuan April 2 khan e-commerce company-te chu an website-a ei tur lam chi an zawrh chhuahte chu category-ah thliar fel vek turin a lo hrilh tawh a ni. Hei hi 'health drink' or 'energy drink' category-a Dairy Based Beverage Mix, Cereal Based Beverage Mix, Malt Based Beverage te zawrh chhuah a nih vang a ni. FSSAI chuan FSS Act 2006-ah 'health drink' sawi lan leh bithliah siamna engmah tarlan a ni lo, a ti. Hei vang hian he category-a in tur lam chi an dahte chu paih veka, danin a tarlan anga an awmna tur âwm ber category-a dah zawk turin a ti.