BJP-in Lok Sabha inthlanpui tur atana an manifesto tlangzarh

Bharatiya Janata Party (BJP) chuan nimin khan Delhi-a an party headquarters-ah kum 2024 Lok Sabha inthlanpuia an party manifesto tur 'Sankalp Patra' an tlangzarh. Party manifesto tlangzarhnaah hian prime minister Narendra Modi bakah BJP hruaitu langsar tak takte an tel a ni.

BJP manifesto ziahna, Sankalp Patra hi PM Modi-a'n tlangzarhin, sorkar aṭanga hamṭhatna dawng leh enkawlna uluk zawk dawng tura thlan; GYAN (Gareeb - mi rethei, Yuva - Ṭhalaite , Annadata - Loneitute leh, Naari Shakti - Hmeichiate) aiawha din board pali hruaitute hnenah manifesto copy hi a hlan zui bawk a ni. Manifesto tlangzarhnaah hian PM Modi chuan,"BJP hian kum 10 kal ta chhung khan a manifesto-te thutiam angin a tihlawhtling vek a, mainfesto zahawmna a siam ṭha a ni. Kuminah pawh hian June 4-a inthlan result puan a nih zawh veleh manifesto-a kan thutiamte tihlawhtling turin kan thawk nghal ang," tiin, BJP chuan One Nation, One Election tihpuitlin a tum thu te, Uniform Civil Code (UCC) chu ramin a mamawh thute a sawi tel bawk.

BJP manifesto hi 'Modi ki guarantee' (Modi-a thutiam) tiha innghat niin, hei hian Narendra Modi-a sorkarin ram chhung hmun tina mi chi hrang hrang bakah, a bik takin GYAN-te tana a hmathlir neih leh hmasawnna kawng tur ngaihtuahsak chu a ngai pawimawh a ni. BJP hian inthlan manifesto buatsaih tur hian defence minister Rajnath Singh-a kaihhruai committee an din a, he committee hi manifesto buatsaih tur hian ṭum hnih inhmu khawmin, ruahmanna hrang hrang an neih zingah ram puma mipui ngaihdan la turin Van an tir chhuak bawk a ni.

BJP chuan an manifesto-ah hian miretheite tana a thlawna ration sem chu kum nga chhung pawhsei te, Ayushman Bharat huang zauh te, ni zung chakna eng pek chhuah hmanga electric man chawi ngai loa siam leh, in sak ṭanpuina a kalpui mek chu huang zauh a tiam. Eirukna do chhunzawm a, state zawng zawng tana zawm tura UCC duan te, loneitute hnena kum khata Rs 6,000 pek chhunzawm, hunbi mumal taka minimun support price (MSP) tihsan, electric lirthei chawilar a, a charge-na hmun tam zawk dah leh airport siam belhte chu a thil tiam zingah hian a tel.