Hri kai hmuh chhuah thar zat tlahniam zel

India ramah kar liam ta Inrinni khan Covid-19 kai hmuh chhuah thar mi 45,674 awmin, a hma ni aiin hri kai hmuh chhuah hi 9% in a tlahniam a ni. Nimin thleng khan ram pumah hri kai hmuh tawh hi mi 85,07,754 an tling tawh. 

Inrinnia Covid-19 vanga thi awm zat chu 559 niin, hripui vanga thi hi mi 1,26,121 an awm tawh bawk. India hi ram hrang hrang zinga hripui thihpui, fatality rate hniamna ber zingah a tel a ni.

Hri kai zingah enkawl dam mi 3,967 awmin, hri kai enkawl dam tawh hi nuai 78.7 an tling tawh a,  hri kai mek hi 5,12,665 an la awm. Ni 10 chhung chu a zawnin hri kai mek hi mi nuai ruk hnuai lamah an awm tawh a ni. Recovery rate hi 92.5% a ni pha tawh. 

Inrinnia hri kai hmuh thar zinga 53% chu Delhi, Kerala, Maharashtra, West Bengal leh Andhra Pradesh ami an ni a, Himachal Pradesh-ah chuan ni 52 chhunga hri kai hmuh thar tam ber ni thlengin, mi 573 in hri an kai thar tih hmuh chhuah a ni. 

Union health ministry chuan hun eng emaw chen  hnuah hripui thihpui rate hi 1.48% ah a tlahniam tih sawiin,  1% hnuai lama a awm theihna turin theihtawp chhuah zel an tum tih a sawi. 

Hetih lai hian mithiamte leh sorkar agency-te chuan India ram khawpui hrang hrangah air pollution level a san chhoh leh avangin hri kai an pun chak chhoh phah leh an hlauthawng hle a, September thla laihawl vela ni khata hri kai hmuh thar mi 90,000 chuang an awm chhoh leh hun ang kha a thlen chhoh mai a  hlauhawm niin an sawi. Hei vang hian state tam tam chuan Diwali lo thleng tura halpuah leh halmawi halten boruak a ti bawlhhlawh zual tur venna atan halpuah/ halmawite an khap tawh.