AgustaWestland case : CBI-in Air chief hotu hlui thu zawtfiah

AgustaWestland nena VVIP chopper deal siam chungchanga buaina kal zelah, Central Bureau of Investigation (CBI) chuan nimin khan Air Chief Marshall hlui, SP Tyagi (retd) chu thu an zawtfiah.

CBI hian kar kalta Zirtawpni khan Tyagi bakah a laichinte pathum chu thu zawh fiah tur hian a lo ko tawh a ni.

VVIP hman tur Indian Air Force hnena helicopter 12 supply-na tura AgustalWestland company inremna siampui a nih danah, company-in contract a hmuh theih nan hian Indian official eng emaw zat hnenah thamna sum tam tham tak a pe a, hemi chungchang hi CBI chuan a chhui mek a ni.

IAF hlui, Tyagi hi AgustaWestland-in contract a hmuh theih nan hian danin a phut angte siam danglamah puh a ni. Helicopter-in a thlawh theih tur china bituk, meter 6,000 chu ama thua meter 4,500-a tihniamah puh a ni. Hetianga a siamṭhat avang hian AgustaWestland pawh hian contract hi a hmuh theih phah niin CBI chuan a sawi. Mahse Tyagi chuan an puhna hi thu dik lo a nih thu sawiin, thutlukna chu ama mimal siam ni loin, senior official-ten an ngaihtuah hnua an siam a ni, a ti. CBI hian a hma pawhin Tyagi hi thu a lo zawtfiah tawh a ni.

Kar kalta Inrinni khan CBI chuan IAF deputy chief hlui, Air Marshal JS Gujral (retd) chu thu an lo zawtfiah tawh bawk.

Defence Minister Manohar Parrikar chuan inremna siam a nih danah thu dik tak chu Parliament-ah Nilaini hian sawichhuah alo tiam tawh a ni. Inremna siam a nih dan record hi Italy aṭangin an dawng tawh niin an sawi.

Cheng vaibelchhe 3,600 man VVIP helicopter 12 supply-na tur contract hmuh theih nan AgustaWestland-in Indian official ṭhenkhatte thamna sum a pe tih hriatchhuah a nih hnu hian, Congress kaihhruai UPA sorkar khan he inremna siam hi a lo titawp tawh a ni. Hemi chungchang hi Italy pawhin a chhui a, Italian prosecutor-te chuan AgustaWestland parent company, Finmeccanica CEO chuan Indian official-te hnena thamna pe tur hian middlemen a hmang ṭhin tih pawh an sawi.

AgustaWestland deal vang hian nimina Rajya Sabha rorel inkhawmah pawh member-te in au buai lehin, inkhawm tihtawp a ngaih phah. Rorel inkhawm ṭan a nih ve leh, Trinamool Congres member-te chuan thil dang buaipui loa hemi chungchang hi sawiho phawt an phut a, mahse Defence Minister-in May 4-ah a sawifiah dawn tih sawi mah se, eptute hian rorel thei loin bengchheng an siam zui a ni. Congress party pawhin May 4 kher nghak loin minister chu sawifiah nghal turin an phut bawk.

Trinamool leh Congress member-te hi house laiah chhuak khawmin, Defence Minister chu he scam chungchang hi sawifiah nghal turin an phut a, hei vang hian minute 30 chhung inkhawm tihtawp a ni ta a ni.