Jharkhand MNREGA worker-ten Modi hnenah Rs 5 pe kir

Sorkar laipuiin Jharkhand state-a MNREGA worker-te hlawh Rs 5-a a tihsansak hnuah, hnathawktute chuan hlawh tihpunna Rs 5 note chu envelope-ah khungin, Prime Minister Narendra Modi-a hnenah an thawn.

PM hnena pawisa an thawn rual hian tihelna thu ziak an thawn tel bawk a, hnathawktute chuan state ṭhenkhatah an hlawh lak aia tlem la an awm laia an hlawh tihsan a ni chu an 'vannei' hle tih an sawi.

"Odisha state-a MNREGA worker-te hlawh chu tihsan a ni lo a, an dinhmun hi kan ngaihtuah hle a ni. MNREGA worker-te hlawh a tihsan theih loh avangin sorkar laipui hian sum a indaih lo hle niin kan ngai. Hei vang hian kan hlawh tihpunna Rs 5 pawh hi keini aiin in mamawh zawkin kan hria a ni. Seventh Pay Commission in hman dawn avangin sorkar hnathawk leh pension te hlawh atan kum khatah cheng vaibelchhe nuai khat chuan insen belh a ngai a, defence lama sum senso atan cheng vaibelchhe nuai 2.5 a ngai bawk si. Company liante chhiah pek dan turah ngaihnathiamna i siamsak a, man tlawm takin ram leh an mamawh dang i pe bawk a, hei vang hian sum pawh i sen hnem hle kan ring a ni" tiin an ziak.

Sorkar laipui sum sen dante an ngaihtuahin, MNREGA worker-te chuan ni khata an hlawh tihpunsakna chu lakkhawm a, pekkir leh mai an duh tih an sawi a, hei hian sorkar ṭhian ṭha sumdawng lian leh sorkar hnathawkte a tihhlim theih ngei an beisei thu an sawi bawk.