Taloja Central Jail-ah Arnab Goswami sawn

Mumbai police-te chuan Republic TV editor-in-chief, Arnab Goswami chu nimin chawhma lam khan security thil avangin Taloja central jail-ah an sawn.

November 4 khan Arnab Goswami hi Mumbai police-te chuan IPC section 306 (abetment of suicide) tlawhchhanin an man a, an man chhan hi kum 2018-a kum 53 mi, Anvay Naik leh a nu intihhlum chungchang vang a ni. Republic TV-in an pawisa ba an pek duh loh vangin an intihhlum phah niin police official-te chuan an sawi a, Anvay-a'n a thih hmaa lehkha a hnutchhiahah pawh Arnab Goswami-a'n a pawisa tam tham tak a batsak chu a pek duh loh thu leh, hei vang hian sum lama harsatna nasa tak a tawh phah thu a sawi. 

Man a nih hnuah Goswami hi Alibaug Government School-ah dah a ni a, he hmun hi quarantine centre-ah an hmang zui a ni. Ni li chhung he hmuna hren a nih hnuah Taloja jail-a dah turin an hruai chhuak ta a ni. 

Arnab Goswami chuan phurh chhuah a nih lai hian a tanna hmunah hrehawm taka an enkawl a nih thu a sawi.  An phur chhuah hun laia media mi lo awm te chu jail bus aṭang chuan amah zui turin a ti a, bus a chawlh chhung zawk hian Goswami chuan a nun chu hlauhthawnawmah a awm mek thu a sawi bawk. A lawyer pawh hmuh an phalloh thu te, a tanna hmuna nghaisak a tawh thute a sawi a, court chu amah pui turin a ti bawk a ni.

Raigad crime branch-a investigating office inspector, Jamil Shaikh chuan Goswami hi a mobile phone kaltlanga social media-a a khawsak dante an enthlitlai reng thu a sawi a, Alibaug-a a tanna hmuna a phone a hman dante enthlitlai turin jail superintendent hnenah lehkha a thawn thu Shaikh chuan a sawi. Hei vang hian a phone chu an man sak zui bawk. 

Kar liam ta Inrinni khan Justice SS Shinde leh MS Karnik awmna Bombay high court bench chuan, Goswami hi interim bail an pe dawn nge dawn lo tih chu hun rei tak chhung video conference kaltlangin an rel a, court thutlukna hi vawiin tlai dar 3 hian puan chhuah tum a ni.