ISRO-in EOS-01 Satellite kap chhuak

Andhra Pradesh, Sri­harikota-a Satish Dhawan Space Centre aṭangin kar liam ta Inrinni khan Indian Space Research Organisation (ISRO) chuan PSLV-C49 hmangin satellite EOS-01 chu tlai dar 3:12 khan hlawhtling takin a kapchhuak.

Satellite EOS-01 hian X-band synthetic-aperture radar a keng tel a, vansang aṭangin khawchin a rawn thlir lawk thei dawn a, agriculture (loneih lamah), forestry (ramngaw hum­halh) leh disaster management (chhiat rupna) lamah nasa taka pui thei tura duan a ni. Low earth orbit-ah a awm dawn a ni. He satellite rual hian foreign (customer) satellite pakua kahchhuah tel a ni bawk.  

Hlawhtling taka kahchhuah a nih hnu hian ISRO chairman Dr K Sivan chuan a hlawhtlin theihna chhan chu hmun hrang hranga engineer, technician leh hnathawktu kalkhawmte thawhrim rah a nih thu a sawi a, centre hrang hrang aṭanga hardware-te lakluh a nih theih vangin he satellite hi duan chhuah a, kahchhuah theih a nih thu pawh a sawi bawk.

Prime minister Narendra Modi chuan Covid-19 hri leng karah pawh India scientist-te chuan an hnathawh tur an ṭulh loh thu leh hlawhtling taka satellite an kahchhuah theih avangin an chungah lawmthu a sawi a, India chuan science lamah hma a sawn zel thu pawh a sawi bawk. Modi bakah hian union home minister Amit Shah chuan ISRO hnenah lawmpuina thu a sawi bawk a ni.