Assam-ah farm law duh lohna lantirtu Congress hruaitute man

Assam-a Darrang district-ah kar liam ta Inrinni khan sorkar laipuiin a siam thar farm law duh lohna lantirin Congress hruaitu mi 100 velin rally an buatsaih a, mahse he district-ah hian mi panga aia tam punkhawm khapna dan hman a nih avangin heng mite hi police-te chuan an man.

Hemi chungchangah hian Darrang superintendent of police Amrit Bhuyan chuan Darrang district-ah hian CrPC section 144 hman mek a nih thu a sawi a, Covid-19 vangin mipui punkhawm khapna chu khuahkhirhna hman mek a ni tih a sawi. Congress hruaitu­te hian rally phalna an dil thu Bhuyan chuan a sawi a, mahse an remti lo chungin rally hi an nei lui a ni, a ti. 

Police-te chuan an mi mante hi a hnuah bail-in an chhuah leh nghal vek a ni. An man zingah hian Assam aṭanga Rajya Sabha MP Ripun Bora leh Ranee Narah an tel a, Lok Sabha MP Gaurav Gogoi leh MLA Nandita Das, Rekibuddin Ahmed, Abul Kalam Rasheed Alam, Rakibul Hussain, Jakir Hussain Sikdar leh Nurul Huda-te chu an man bawk a, anni bakah hian hruaitu ṭhahnem tak an man bawk a ni.

Rally buatsaihtute hian kar liam ta Zirtawpni khan Darrang district administration hnenah Kishan Tractor Rally neih an dil a, mahse he district-ah hian CrPC section 144 hman mek a nih vangin phalsak an ni lo. A tukah rally hi an nei lui a, Rajiv Bhawan campus ward no 2 aṭangin Deputy Commissioner office thleng kawng an zawh a ni. 

Assam Pradesh Congress Committee (AICC)-a general secre­tary Jitendra Singh chuan "Lonei­tute kalh zawnga sorkar mek te hi kan do zel dawn, an dan thar siam hi loneitute tana ṭha lo leh loneitu­te rahbehna tur a ni," a ti.