SC-in Kejriwal-a thubuai a ngaihtuah chhunzawm dawn

Supreme Court chuan nimin khan Delhi excise policy thubuaia man leh Delhi High court-in man a nih a khinna a hnawl tawh, Arvind Kejriwal-a thubuai chu ngaihtuahin, Kejriwal hi tun dinhmunah chhuah a nih loh tur thu leh, April 29-ah a thubuai hi ngaihtuah chhunzawm a nih tur thu a puang.

Arvind Kejriwal hian Supreme Court-ah hian Enforcement Directorate (ED)-in an man chungchang a khinna petition theh lutin, nimin khan judge pahnih; Justice Sanjiv Khanna leh Dipankar Datta te ṭhut bench chuan a ngaihtuah a ni. Kejriwal hian man a nih a khinna hi Delhi High Court-ah a lo theh lut tawh a, mahse, high court hian kar hmasa khan Kejriwal man a nih chungchangah thil dik lo a hmuh loh thu sawiin a lo hnawl tawh a ni. Man a nih a khinna hi Supreme Court-ah a theh lut leh a, hei hi nimin khan ngaihtuah a ni a, SC hian he thubuai hi uluk zawka April 29-a ngaihtuah tur a nih thu leh Kejriwal chu chhuah theih mai a nih loh thu a puang.

Central Bureau of Investigation (CBI) leh ED special judge, Kaveri Baweja chuan court-ah Kejriwal chungthu ngaihtuah a nih hnuah judicial custody-ah dah a nih hun pawh a pawtsei bawk a, Kejriwal hi April 23 thleng hren chhunzawm a ni ang. ED hian Kerjiwal hren hun pawhsei hi a dil a ni. Kerjiwal hi ED-te'n March 21-ah an man a, tunah hian Tihar Jail-ah a tang mek a ni.

Kejriwal-a ukil, Abhishek Singhvi chuan Kejriwal-a petition theh luh ngaihtuah hun tur chu sawn hma turin ngen mah se, court chuan April 29 chu a hma theih dan ber niin a sawi ve thung. Thubuai ngaihtuah hun atan hian ED bakah, Solicitor General, Tushar Mehta leh ASG SV Raju te chuan Kejriwal-a'n a khinna chungchang an chhanna tur theh luh an pawm thu sawiin, court hian April 24 thleng hun a pe bawk a ni.