Delhi CEO-in vote thlak ni hlawh la chunga chawlhah a puang

Delhi Chief Electoral Office (CEO) chuan Delhi-a Lok Sabha inthlan vote thlak ni, May 25 chu hlawh la chunga chawlhah a puang. CEO thuchhuaha tarlan a nih danin, he thupek hian sorkar leh mimal hnuaia thawkte pawh a huam vek dawn a ni.

Delhi Chief Electoral Officer, P Krishnamurthy chuan sorkar hnathawk emaw, private hnathawkte emaw pawh, Delhi-a vote nei an nih phawt chuan he thupek hian a huam thu tarlangin, Delhi ṭhenawm, Uttar Pradesh, Haryana leh Rajasthan mi, Delhi-a hnathawkte pawh vote thlak tura an state-a an haw chuan, vote thlak ni chu hlawh la chunga chawlh pek hian a huam vek tur a ni, a ti.

Krishnamurthy chuan,"Inthlan hlawhtlin nana vote thlak tam zawk an awm theih nan, Election Commission of India (ECI) thuchhuah zulzuiin, Representation of People's Act, 1951, section 135b hnuaiah Delhi-a hnathawk zawng zawngte tan, vote thlak ni chu hlawh la chunga chawlh pek an ni," tiin a sawi.

ECI thuchhuah anga Delhi CEO-in hlawh la chunga chawlh a puan hi Delhi leh a chhehvela chengte tana vote thlak pawimawhna entirna a nih thu sawiin, sorkar emaw, private pawh, an hnuaia thawktu chhawr nei zawng zawngte chuan vote thlak turte'n chanvo an neih hi zahsak a, harsatna siamsak lo turin an ngen a, dan zawm lo chu hrem theih an nih thu a tarlang bawk.