Mayawati-i'n Western UP tan state pek a tiam

Bahujan Samaj Party (BSP) president Mayawati chuan central-ah an sorkar a nih chuan western Uttar Pradesh tana state hran pek a nih theihna turin hma an lak tur thu a sawi.

Mayawati hian Muzaffarnagar parliamentary seat-a an party aṭanga ding tur, Dara Singh Prajapati tana rally buatsaih-ah he thu hi sawiin,"Western Uttar Pradesh hi state hran ni turin in duh a, hemi tihlawhtling tur hian lang thei leh hmuh theihin kan party-in central-a sorkarna kan siam a nih chuan hmalak a ni ang," tiin a sawi. Mayawati hian UP thlang lama Muslim leh Jat hnamte zinga inpumkhatna leh inunauna ṭha zawk siam a ṭul thu sawiin, BSP sorkar hunlaia remna a awm ṭhin dante a sawi bawk. "Inthlan dik leh felfai tak buatsaih a nih a, voting machine-te khawih danglam a nih loh bawk chuan BJP chuan sorkarna an siam tawh lo ang. BJP hian mi hausate vulh len hna chiah an thawk a, inthlan leh thil dang pawh heng mi hausate hmang hian an kalpui ṭhin a ni," a ti.

Uttar Pradesh-ah hian Lok Sabha inthlan hi thawh sariha neih a ni dawn a, BSP hian party malin an chuh dawn a ni. Hetih lai hian Samajwadi Party (SP), Congress leh All India Trinamool Congress-te chuan INDIA hnuaiah inthlan hi an chuh ho dawn a, BJP, Apna Dal (S), NISHAD party leh SBSP te chu NDA-a thawkho an nih angin UP-ah hian inthlan an chuh thung ang.