X-ah India mi account nuai hnih chuang tihtawp a ni

Elon Musk-a company, X chuan thla tina report an buatsaih ṭhin thar lam berah thla khat chhung lekin India ram chhunga mi, X account 2,12, 627 zet tihtawp a nih thu sawiin, heng account tihtawpte hi a neitu phalna loa mi saruak thlalak post leh mipat hmeichhiatna hawia naupang tarlanna kaihhnawih a nih thu a sawi.

X hian kawng hrang hrangin mipat hmeichhiatna rawng kaia naupang tarlanna leh firfiaka chetna ang chi a thlithlai a, hma an lak reng thu an puang a, firfiaka chetna kaihhnawihah hian India rama X account 1,235 zet chu tihtawp a lo ni tawh bawk a ni. X chuan harsatna thlenna tura an buatsaihah India aṭang hian thla khat chhungin complaint 5,158 an dawn thu an tarlang bawk a, complaint tam zawk hi mipat hmeichhiatna lam hawi, inhuatna rawng kai, mimal inbeihna leh intihduhdahna bakah account tihtawp tawh a thara siam leh chungchang te a ni. Heng bakah hian X hian account tihtawp tura warning pekte'n account titawp lo tura an ngenna complaint an dawn nasat thu an tarlang bawk.