Vengaivayal khaw mipuite'n LS inthlan boycott an tum

Tamil Nadu-a Pudukottai district-a Vengaivayal khaw mipuite chuan December 2022-a an khaw tui dah khawlna, tanky-a mihring ek dahtu police-in an la man loh avangin Lok Sabha inthlan lo awm tur boycott an tum thu an puang.

Thawhṭanni khan Vengaivayal khuaa Dalit chengte chuan an khaw chhung hmun hnihah Lok Sabha inthlan lo awm tur boycott an tumna hi an tarlang a, he khuaah hian Dalit hnam, chhungkaw 30 vel an awm nia hriat a ni. He khuaa cheng, M Sindhuja chuan,"Pawikhawihna a thlen aṭangin kum hnih a tling mai dawn a, tun thlengin pawikhawihtu man a la ni lo a ni. Inthlan lai chiahin politician-te hian min rawn tlawh a, pawikhawihna a thlen hlim chhawnah chiah kan khuaa thil thleng hi ngaih thutak a ni, mahse, he khuaa mite chuan vawiiin thlengin, rilru lam thlengin harsatna kan nei thung," tiin a sawi. Singhuja hian police-in nuar tura an rinhlelh reng avangin khaw dangah pawh bus hmanga an kal theih loh thu a sawi a, an chhungte pawhin an khua chu an tlawh theih loh thu leh, puipunna tur thil reng rengah police phalna an lak hmasak zel a ngaih thu a tarlang.

Vengaivayal khuaa Dalit-te'n Lok Sabha inthlan boycott an tum thu an tarna banner hi district election official-te chuan lak thlak a ni tawh niin an sawi a, mahse, khaw mite chuan thuneitute'n an tihtir niin an sawi ve thung. Khaw mite chuan an banner tarte an lak thlak loh chuan thubuai ziah luh a nih tur thuin thuneitute'n an vau niin an sawi. Dalit zinga mi, KR Murugan chuan an khua chu police-in an thlithlai a an ven reng avangin tan in zau tak ang mai a nih thu a sawi ve bawk.

Inthlan boycott tumtu, Vengaivayal khaw mipuite hi Dalit hnam an ni a, inthlan boycott an tum chhan, December 26, 2022-a an khaw tui dah khawlna tanky-a mihring ek dahtu hi CB-CID-in chhui mah se, vawiin thlengin chhui chhuah a la ni lo. CB-CID te hian finfiahna mumal tak an la nei lo a, DNA test neih mek niin, rinhlelh mante pawh zirchian mek an la ni.