BJP-in Rahul Gandhi lakah complaint an theh lut

Bharatiya Janata Party (BJP) chuan nimin khan Election Commision of India (ECI) hnenah Congress party hruaitu, Rahul Gandhi lakah prime minister Narendra Modi chungchanga a thu sawi avangin complaint an theh lut.

BJP hian Rahul Gandhi hi Coimbatore-a Lok Sabha inthlan lo awm tur atana campaign a neihnaah ṭawng leh hnam inṭhen darh theihna hawi zawnga thu sawiah puhin, Tamil ṭawng hmangtute rilru hruai kawi a tum niin an tarlang.

Election Commission hnena BJP-in complaint an theh luhah hian Rahul Gandhi chuan ṭan chhan mumal tak pawh nei loin, Prime Minister Modi chuan India ram pum tan ṭawng pakhat chauh a duh thu a sawi niin an tarlang a, hei hi PM Modi-a'n Tamil ṭawng a dodal anga lantir tumna a ni, an ti. "Hetianga thu dik lo, fiahna leh ṭan chhan awm lo, dawt hmanga inpuhna hmang hian Prime Minister a sawi chhia a, Tamil Nadu mipuite lakah PM huatna a tuh bawk a ni. Inthlana a dinhmun ṭhat theih nan ṭawng leh hnam anga inṭhen theihna tur kawng a zawng a ni," tiin, BJP hian Election Commission hnenah complaint an theh lut a ni.

Rahul Gandhi hian Model Code of Conduct (MCC) a bawhchhiat thu leh, Representations of the People Act inkaihhruaina bakah, dan eng emaw zat a bawhchhia niin BJP chuan an sawi a, EC hnenah hian Rahul Gandhi chuan vantlang hriata ngaihdam dilna siam tura an duh thu an sawi tel bawk a ni. Heng bakah hian EC chu Rahul Gandhi man tur leh thu sawi khapsak a, a laka FIR theh luh a nih theih nana hma la turin an ngen zui bawk.