Kejriwal hi tan in aṭangin chief minister a ni chhunzawm ang : AAP

Aam Admi Party (AAP) Rajya Sabha MP, Sandeep Pathak chuan Delhi excise policy thubuai avanga an man, Delhi chief minister leh AAP hruaitu Arvind Kejriwal chuan a tanna hmunah kar tin minister pahnih a kawm ṭhin tur thu leh, an hnathawh dan a thlirpui ṭhin tur thu a sawi.

Thawhṭanni khan AAP hian press conference neiin, he hunah hian AAP National General Secretary (Organization), Sandeep Pathak chuan Arvind Kejriwal chu tan inah awm mah se, AAP hruaitu leh Delhi chief minister a nih chhunzawm tho tur thu a sawi a, CM-in department hrang hrangte tana ruahmanna a neihte a tarlang bawk. "Karleh aṭang chuan chief minister hian tan inah minister pahnih a kawm ziah tawh dawn a, an hnathawhte a thlirpui ṭhin dawn bakah, hmalak zel dan turah ruahmannate a siampui ṭhin bawk ang. He kan thil tum hlawhtlin nan hian dan anga kan tih theih apiang kan ti dawn a ni," a ti. Pathak hian AAP MLA-te chu mipuite ngaihtuahna leh dinhmun ṭawmpui thei tura anamhni ngei in tina kal tura Kejriwal-a'n a chah thu a sawi lang bawk.

Enforcement Directorate (ED)-in March 21-a an man hnuah Arvind Kejriwal hi Tihar jail-ah dah a ni a, Delhi High court leh Supreme court-ah man a nihna hi khing mah se, court hian an hnawlsak ve ve a, April 23 thleng hren chhunzawm a la ni dawn a ni.