Lok Sabha inthlan thawh khatna state leh UT 21-ah nei dawn
Lok Sabha inthlan, 2024 chu Election Commission of India (ECI)-in thawh sariha neih tura ruahmanna a lo siam tawh angin, April 19 hian thawh khatna neih a ni dawn. Inthlan thawh khatna hi state 21 leh Union Territory (UT) aṭanga constituency 102-ah neih a ni ang.
Inthlan thawh khatnaa inthlang tur state-te hi; Arunchal Pradesh-ah constituency pahnih, Assam-ah constituency panga, Bihar-ah pali, Chhattisgarh-ah pakhat, Madhya Pradesh-ah paruk, Maharashtra-ah panga, Manipur-ah pahnih, Rajasthan-ah 12, Meghalaya-ah pahnih, Mizoram, Nagaland, Sikkim, Tamil Nadu-ah constituency 39, Tripura-ah pakhat, Uttarakhand-ah panga, West Bengal-ah pathum leh, Uttar Pradesh-ah constituency pariat te an ni. UT zingah; Andaman and Nicobar Island, Jammu and Kashmir-a constituency pakhat, Lakshadweep leh Puducherry-ah te inthlan hi neih a ni dawn bawk.
Candidate-te dinhmun
Inthlan thawh khatnaa state leh UT 21 inthlang turah hian candidate 1618 an awm dawn a, hmeichhe candidate hi 134 awmin, candidate zinga 251-te hi thubuai nei mek an ni. Candidate-te zingah crorepati candidate 450 an awm a, heng zinga 193 chu Rs. vbc nga leh a chung lam nei an ni a, hei hi candidate zawng zawng aṭanga 12% a tling pha a ni. Candidate zinga 35%-te hi Rs. nuai 10 aia tlem nei nia tarlan a ni thung. Party anga lakin Bihar-a ding tur RJD candidate palite an hausa ber a, an vaiin crorepati an ni. RJD bakah Tamil Nadu-a ding tur, AIADMK candidate 36 zinga 35-te chu crorepati an ni bawk. BJP chuan candidate 77 aṭangin 69 leh Congress-in candidate 56 aṭangin 49 crorepati an nei bawk. Candidate hausa ber erawh Madhya Pradesh-a Chhindwara constituency-a Congress tana ding tur, Nakul Nath niin, a hausakna hi Rs. vbc. 716 nia chhut a ni.
Election Commission chuan vote thlak ṭan hun hi zing dar 7 a nih tur thu sawiin, inthlan campaign leh a kaihhnawih thil chi hrang hrang buatsaih leh huaihawt ang chi hun pawh heng state leh UT 21-ah te hian nimin tlai dar 6 khan a titawp a, hei hian vote chhiar zawh hma chu a huam dawn a ni.