Sorkar laipuiin farm law siamṭhatna tur rawtna siam

Ramchhunga loneitu pawl hrang hrangin sorkar laipui dan siam thar, Farm Law duh lohna lantir a hun rei tak nawrh an huai­hawt tawh chu tihtawp a nih theihna atan sorkar chuan he dan siamṭhatna turin rawtna a siam. 

Union agriculture minister Narendra Singh Tomar chuan nimin khan farm law siamṭhatna tura rawtna hi siamin, union home minister Amit Shah hnenah a thlen nia sawi a ni. Amit Shah chuan  he rawtna hi a pawmpui a, hemi hnuah argiculture minister hian nawrh huaihawt mek, loneitu pawlte hnenah a rawtna hi a thawn ve leh nghal a ni.

Sorkar laipui rawtna hi loneitu pawlte chuan an ngaihtuah ve leh phawt dawn a, an hma lak zel dan turte an relho ang. 

Loneitu pawl hrang hrangte hian December 8, Thawhlehni khan Farm Law duh lohna lantirin rampum huap, Bharat bandh an lo huaihawt tawh a ni. Bandh an huaihawt zan hian Amit Shah chuan loneitu pawl ṭhenkhat hruaitute chu inbiakna a neihpui a, dan siamṭhat dan tur chungchang a sawipui. Mahse loneitu aiawhte hian sorkar rawtna hi an hnawl a, siamṭhat ringawt an duh lo a, he dan siam tawh hi sut leh vek an phut tih an sawi a ni. 

Eptu party, a bikin Congress leh Left party hruaitute chuan loneitute thil phut chungchangah memorandum thehlut turin President Ram Nath Kovind chu nimin tlai khan an hmu.

Farm law duh lohna lantira loneitu pawl nawrh huaihawt mek hi eptu party hrang hrang 24 chuan an thlawp thu an lo sawi tawh a ni. Mahse nimin tlaia President an hmuhnaah erawh party ṭhenkhat erawh an tel lo thung. 

Covid-19 hri leng vanga khuah­khirhna siam angin, Rashtrapati Bhavan-ah chuan party panga aiawh chauh an tel a phalsak. Presi­dent hmu tura kalte hi Congress hruaitu Rahul Gandhi, Nationalist Congress party chief Sharad Pawar, CPM  hotu Sitaram Yechury , CPI hruaitu D Raja leh DMK aiawhin TKS Elangovan-te an ni.

Eptu party-te hian Parliament-ah Farm Bill ngaihtuah a nih lai khan theihtawpin dan an tum a, mahse Parliament in  hnihah a tlang ta tho a ni. Hemi hnu pawh hian President hnenah hian bill hi pawmpui lo turin an ngen leh bawk. Mahse President chuan Rajya Sabha-a pass a nih hnu lawkah Farm Bill pathumte chu pawmin Act-a chantir turin a hming a ziah hnan nghal a ni. 

Sorkarin rawtna a siam panga te chu -

1. MSP chu tihbo a ni lo ang ,a sorkar laipui chuan MSP hi a kalpui chhunzawm zel ang. 

2. APMC (Agricultural Produce Marketing Committee) law chu nasa taka siamṭhat a ni ang. 

3. Loneitute nena indawr tur, private player-te chu sorkarah an in register hmasa zel tur a ni. 

4. Contract farming chung changah loneitute chuan court pangngaia an thlen theihna tur remchang siamsak an ni ang. Sorkar laipui chuan an hranin fast track court a siamsak ang. 

5. Sorkar laipui chuan private player-te chu chhiah chawi tir a remti.