CAA hmanga dilna lut zat sorkar laipuiin chhinchhiah lo

Sorkar laipuia Ministry of Home Affairs (MHA) chuan sorkarin Citizenship Amendment Act (CAA) hmanga India khua leh tui nihna dilna an dawn tawh zat chu an chhinchhiah loh thu leh, chhinchhiah tura inkaihhruaina siam a nih loh thu an sawi.

Amravati, Maharashtra-a khawsa, Ajay Bose chuan Right to Information (RTI) hmangin CAA dan hman a nih hnua khua leh tui nih dilna sorkarin a dawn tawh zat hi a zawt a, hei hi MHA chuan chhinchhiah an nih loh thuin an chhang a ni. MHA chuan RTI zawhna an chhannaah hian,"Citizenship Act, 1955 and Citizenship (Amendment) Act, 2019 hnuaia dan zamte'n a tarlan loh avang leh inkaihhruaina siam a nih loh avangin dilna lut zat hi chhinchhiah a ni lo a ni. RTI Act, 2005-in a tarlan angin, Central Public Information Officer (CPIO) hi hetiang information buatsaih thei a ni lo a, chuvangin i zawhna hi NIL anga ngaih a ni ang," a ti.

December 11, 2019-a CAA pass a nih khan, union home minister Amit Shah chuan mi nuai aṭanga vaibelchhe chuang daihin an chhawr tur thu a sawi a, hetih lai hian Trinamool Congress MP, Derek O'Brien chuan Intelligence Bureau director report denchhenin, CAA hman tirhah chuan mi 31,000 velin an chhawr theih tur thu a sawi thung. CAA hi Parliament-a pass a nih aṭanga kum li hnu, kumin March 11 khan sorkar laipui chuan hman ṭan turin a puang chauh a ni.