Army-in kumin chhungin Agniveer vawi 96 lak hman tum

Indian army chuan kum 2024-2025 fiscal year chhungin ram chhung hmun hrang hrangah, Agnipath scheme hnuaia sipai an lak ṭhin, Agniveer vawi 96 lak hman an tum thu an sawi.

Army hian Agniveer lak hman an tum zat hi puangin, vawi 11 chu hmeichhe Agniveer lakna tur bika ruahman a ni a, heng hmeichhe Agniveer-te hi military police corps-a mi turte an ni ang. "Army chuan online-a combined entrance exam neih hun tur a buatsaih tawh a, hei hi ram chhung hmun hrang hrang 174-ah kalpui a ni ang. Exam hun hi April 22 leh May 7 inkara neih tura ruahman a ni a, exam tur hi mi nuai 12 chuang an awm beisei a ni," tiin, Agniveer lak belh hunah theihna nei leh, ram tana mahni inpe phal mi eng emaw zat hmuh theih an inrin thu an tarlang tel bawk. Entrance exam hi physical leh medical exam-in a chhunzawm anga, hemi hnuah hian a tlingte puan zar a ni ang.

Army lak dan chungchangah hian sorkar laipui chuan June 14, 2022 khan ruahmanna thar siamin Agnipath scheme hi kalpui ṭan a ni a, kum li chhung hman tura ruahman a ni. Agnipath scheme hnuaiah hian sipaia lak turte chu kum 17.5 leh kum 21 inkar an ni tur a ni a, he scheme hnuaia sipai lakte chu Agniveer tih an ni bawk. Lak hmasak berah khan batch hnih aṭangin mi 40,000 lak an ni a, Navy leh leh Air force hnuaiah mi 3,000 leh 2,700 lak an ni tawh bawk. Kum 2026 thlenga Agniveer lak zat tura ruahman hi nuai 1.75 a ni a, Agniveer-te hi kum li an ṭan hnuah 25% vel cadre pangngaia lak luh an ni ṭhin dawn a ni.