Vijay Mallya'n MP a nihna aṭanga banna thehlut
Sumdawng lian, leiba ngah avanga buaina nasa tak tawk mek Vijay Mallya chuan Rajya Sabha member a nihna aṭanga banna a theh≠lut. Banna a thehlut hnu hian a twitter-ah thilsual titu a nih loh thu a tarlang nghal.
Rajya Sabha Ethics Committee-in Parliament member a nihna paihsak an tum laiin, Thawhṭanni khan Vijay Mallya hian banna hi a thehlut a ni.
London aṭangin banna lehkha hi thawnin, Mallya chuan, "Inchirhthehna nasa takah ka hming a lan zel hi ka duh lo a ni. Hei baka dik hian tun hnaia thil awmdan aṭangin dik taka rorel sak ka ni dawn lo tih a lang a, chuvangin Rajya Sabha member ka nihna aṭang hian ka bang ta a ni" a ti.
Vijay Mallya hian a company tluchhe ta, Kingfisher Airlines hmingin bank hrang hrangah loan, cheng nuai 9,000 chuang zet a ba mek a ni. A leibatna bank-te Supreme Court-ah an zualko hnuin March 2 khan London-ah a kal a, tun thlengin a rawn kir duh lo a, amah ngei pawhin rawn kir a tum lo thu a sawi.
Kar kaltaa chanchinbu pakhatin a kawmnaah, Mallya chuan ram pawn lama tlanchhe tura nawr chhuah a ni tih a sawi a, "Bank-te pawh dawrin buaina chinfel kan duh thu pawh kan sawi reng a ni. Kan leibate pawh kan theih ang tawka a tahtawla rulh kan duh a ni" a ti.
Mumbai court chuan Mallya manna tur thupek a tichhuak tawh a, Britain sorkar hnenah pawh India rama rawn thawn kir tura ngen a ni. Thla hmasa khan a passport pawh cancel sak a ni tawh bawk.
Rajya Sabha-a Ethics Committee chuan April 25 khan meeting neiin, Mallya chu House member ni zui zel tlakah an ngaih loh thu sawiin, May 3-a meeting neih hunah MP a nihna hlihsak tura rawtna siam an lo rel tawh a ni. Mahse meeting an neih leh hmain Mallya hian banna hi a thehlut ta zawk a ni. Committee hian Mallya-a firm, Kingfisher-in bank 13 laka leiba a neih dan kimchangte hriat≠tir turin an phut bawk. Mallya-an leiba rulh tur a neih zat hi cheng vaibelchhe 9431.65 a ni a, IDBI bank bikah pawh cheng vaibelchhe 1687.04 bain, Punjab National Bank hnenah cheng vaibelchhe 1,223 a ba bawk.
Committee chuan Mallya hian parliament member-ten an tih tur, an thil neih leh leiba neihte hi kum 10 kalta chhung khan a tarlang ve ngai lo niin a sawi.