Ram dang palai 64-in Covid-19 vaccine siamna hmun tlawh

India rama Covid-19 vaccine siamna hmun pahnih chu nimin khan ram dang palai 64-ten an tlawh. 

Ram hrang hrang ambassador leh high commissioner-te hian special Air India flight hmangin nimin khan Hyderabad hi an pan a, khawpui dai Genome Valley-a Bharat Biotech leh Biologicial E te vaccine siamna hmun  an tlawh a ni. 

Bharat Biotech chair­man Kishna Ella chuan an company chanchin leh, vaccine siamna kawngah hlawhtlinna a lo neih tawh hrang hrangte chu power-point hmangin palaite hi a lo hrilhfiah a, hemi hnu hian vaccine siamna hmunte chu fankualpui an ni bawk. 

Ram dang aiawhte vaccine siamna hmun tlawh tir hi Ministry of External Affairs (MEA) ruahman a ni a, vaccine siamchhuah leh semchhuahna kawnga ram dang nen thawhdunna ṭha siam tura a hmalakna kawng khat a ni. November thla khan India rama vaccine enchhin mek chungchang pawh ram dang palaite chu hrilhfiah an lo ni tawh bawk. 

Bharat Biotech hian  Indian Council of Medi­cal Research (ICMR) thawhpuiin, India ram chhunga coronavirus vaccine siamchhuah hmasa ber tur, Covaxin siam tumin a bei mek a ni. He vaccine hi ram chhunga centre hrang hrangah phase III clinical trial neih mek a ni. 

Biological E hian US-based vaccine focused biopharmaceutical company, Dynavax Tech­nologies Corporation (Dynavax) leh Houston-a health sciences university Baylor College of Medi­cine nen thawkhoin vaccine an siam ve mek bawk. Drugs Controller General of India-in a pawmpui hnuah November thla aṭang khan clinical trial a nei ve tan a ni.