West Bengal inthlan thawhrukna leh tawpna nei dawn

West Bengal assembly inthlan thawh rukna leh a tawpna ber tur chu vawiin hian assembly bial 25 ah neih a ni dawn.

Inthlan tawpna ber tur hi Easts Midnapore leh Cooch Behar district-ah neih a ni dawn a, bial 25-a inthlan neihna turahhian candidate 170 awmin hmeichhia 18 an tel. Vote nei mi nuai 58 an awm bawk a ni.

Vote thlakna turin polling station 6,774 siam a ni a, zing dar 7 aṭanga tlai dar 6 thleng vote thlak theih a ni ang.

Inthlan hi boruak ṭha leh muanawm tak hnuaia neih a nih theih nan venhimna pawh khauh taka kalpui a ni a, inthlan ni hian CrPC section144 puangin punkhawm khap a ni. Dan leh thupek kengkawh turin zan lamah pawh security force-te duty tir vek an ni bawk.

Vawiina inthlanna neihna tur biala candidate langsar zingah Trinamool Congress candidate Tamluk MP Suvendu Adhikari, state environment minister Sudarshan Ghos Dastidar, minister hlui Hiten Barman leh CPI hruaitu Abdul Kabir Sheik-te an tel.

West Bengal assembly election-ah hian a pumpuiah candidate 1,961 an awm a, an zingah hian mi hausa tawntaw, crorepati 244 awmin, rorellai Trinamool Congress zingah mi 114 an awm. Candidate zingah MLA ṭanglai 245 in an chuh nawn a, an zinga 81 chu crorepati an ni.