NESO-in CAA duh lohna lantirin Dec 11-ah 'Black Day' an hmang dawn

Hmarchhak biala zirlai pawl hrang hrang intelkhawm, North East Students' Organisation (NESO) chuan December 11 hian Citizenship (Amendment) Act, 2019 duh lohna lantirin, hmarchhak state hrang hrangah 'Black Day' hman a tum. 

NESO chairman Samuel B. Jyrwa chuan thuchhuah siam­in, hmarchhak biala leilung faten theihtawpa Citizenship (Amendment) Bill 2019 an dodal chungin, sorkar laipui chuan an ngennate engah mah ngai loin, December 11,2019 khan he dan sakei,Citizenship (Amendment) Act 2019 chu Rajya Sabha-ah a pass lui a ni," a ti.

Dec 11 chu NESO chuan hmarchhak bial pum tan Black Day-ah a lo puang tawh a, hei  vang hian kuminah pawh state hrang hrangah Black Day hi hman a ni a, hmun pawimawhahte flag dum leh banner dumte zar a ni ang, tiin Jyrwa chuan a sawi.  

Black Day hman a nih chhan hi sorkar laipui hnenah CAA chu an pawm thei dawn lo tih hriattirna te, hemi rual hian sorkar laipuiin hmarchhak leilung fate laka dik lo taka ro a rel dan mipuite hnena hriattir nawn lehna tur a ni tih NESO president chuan a sawi bawk.

Hei vang hian Black Day an hman tur chu thlawp vek turin hmarchhak mipuite a ngen a, Pathianin hmarchhak mite chanvo leh dikna a pekte chu humhalh tura bei chhunzawm zel turin a chah bawk a ni. 

NESO-ah hian hmarchhaka zirlai pawl hrang hrang - Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) leh All Arunachal Pradesh Students’ Union (AAPSU) te an tel.