Nitish Kumar-an zu siamna factory tichhe turin hmeichhiate fuih

Bihar Chief Minister Nitish Kumar chuan an state chhunga zu khapna dan hman a nih hnuah, hmeichhiate chu tualchhunga zu siamna factory-te tichhe turin a fuih a, thuneituten an theih angin an pui zel dawn tih a sawi bawk.

Thawhlehnia Kosi biala Saharsa hmuna inkhawm buatsaiha he thu hi sawiin, CM chuan, "Hmeichhiate chuan zu siamna factory awmna hmunte an hria a nih chuan tichhe nghal zel rawh se. Hetianga an ti a nih pawhin roreltute chuan an thiltih chu an thlawp zel dawn a ni" a ti.

An state-a zu khapna dan hman mek chu mipui tam zawkin an thlawp thu Nitish Kumar chuan a sawi a, zu khap mek a hlawhtlinna theina tura an chakna pakhat chu hmeichhiate an nih thu a sawi.

Bihar state hian April 5 aṭanga zu a khap tak avangin kumtina zu chhiah aṭanga sum an lak luh ṭhin, cheng vaibelchhe 4,000 chu a chan dawn a ni.

Nitish Kumar chuan Bihar-ah zu an khap thei a nih chuan, an ṭhenawm state Jharkhand pawhin a khap thei ngei dawn a ni, a ti. Jharkhand bakah Uttar Pradesh leh West Bengal-ahte zu khapna dan siam tura a campaign tur thu a sawi bawk.