Sorkar laipuiin a thu thlak, Uttarakhand sorkar fiah a remti

Sorkar laipui chuan Uttarakhand-a Congress hruaitu, Chief Minister Harish Rawat-a kaihhruai chu Assembly-a fiah a nih hma chiahin fiah theih lohin President's Rule a puan hnan a, mahse Supreme Court a inrawlh hnuah nimin khan sorkar laipui chuan state sorkar fiah a remtih thu a sawi.

Uttarakhand-a Harish Rawat-a kaih-hruai sorkar-a Congress MLA pakua-te chu CM lakah an hel a, CM-in state budget a pharh pawhin heng MLA te hian a dodal zawngin an vote nia sawiin sorkar laipui chuan President's Rule hnuaia dah a ngai nia sawiin, sorkar fiah a nih hma chiah, March 27 khan President's Rule hi a puan hnan a ni.

April 21 khan Uttarakhand High Court chuan an state-a President's Rule puan chu hnawlin, April 29-a floor test nei turin thupek a tichhuak a, mahse hei hi sorkar laipui chuan Supreme Court-ah a appeal avangin High Court thupek siam hi hnawlin, President's Rule hi hman chhunzawm leh a ni.

Sorkar laipui chuan Uttarakhand sorkar fiah a remtih thu hi a sawi rualin, Supreme Court hnenah observer ruat turin a ngen nghal bawk.

Court chuan chief election commissioner chawl tawh kaihhruaina hnuaiah floor test hi May 11, dar 11 a.m -1 p.m inkara nei turin a ti a, vote lak lai pawh hi video hmanga lak vek tura tih a ni. Legislative assembly-a principal secretary chuan vote thlak leh video recording hi May 11 vek hian Supreme Court-ah a pe nghal dawn a ni. Sorkar fiahnaa tel tur MLA te himna chu ngai pawimawh turin chief secretary leh director general of police-te pawh hriattir an ni bawk a ni.

Vote laknaah hian MLA hel pakua, House speaker-in a lo disqualify tawhte chuan vote an thlak ve thei lo ang.